Arkiv for april, 2006
Gaffel i brødristaren
laurdag, 22. april, 2006
Pappa, smått isolert i påska, prøver å få med seg siste nytt frå tekst-TV
Til sommaren blir det nok dongeribukse og kvite sko på meg òg.
Alt kan tolkast
fredag, 21. april, 2006
Ting ein gjer i Thailand:
Seie Sa- was- dee- ka til alle heile tida, altså hei enkelt og greit
Smilar til alle ein ser og ikkje ser. Det verste ein kan oppleve er å bli oppfatta som sur eller grinete. Verkeleg det aller verste. Eg har prøvd og vart regelrett ledd ut av seks resepsjonistar
Et middag til frukost. Alt går i grisen, og ris går til absolutt alle måltid utan unntak
Et annanas så det tyt ut øyra
Ventar på neste regnbyge
Blir skikkeleg dårleg i engelsk sidan alt går i; oki, you want skirt, oki, i give good price only for you oki, no, no, no come, i Show and you buy oki. Very good oki. You want dvd too? Kvifor bruke tid på alle orda som eigentleg ikkje har noko å seie?
Et mykje chili, utan å ha bestilt det
avviser alle, og det er mange, som gjerne vil ha ein kjærast; you give boyfriend oki? i need white boyfriend!
får vener som ein nødvendigvis ikkje skjønar så mykje av kva seier, men som like hjarteleg tek deg i handa når du kjem
Ting ein gjer i påska
torsdag, 20. april, 2006
tante, tanteborn, luskande onkel
Eg har fått ei bok eg trur er flott, Henri Cartier-Bresson - The man, the image, the world (om ikkje dét er ein pretensiøs tittel, så veit vel ikkje eg). Trur elles eg noko motvilleg nærmar meg vaksenlivet - all den tid eg har brukt dagen til kursing med Anthony Bateman på SAS-hotellet. No skal eg høyre på World music, ikkje sei det til nokon.
Sjokolade/Hallois
laurdag, 15. april, 2006
Haakon: etar av sjokolade - lagar av hallois
Ei kort liste over nye paraplybloggar:
No: Jobb + Os.
Strikkpropellfly
fredag, 14. april, 2006
Åsmund & Hjørund - etter ein lang dag med flyging
Eit lite notat om påska, slik at eg kan seinare kan finne ut korleis det var.
Sentrale opphaldsstader: Sandane, Bergen, Os. Dagar på Utvikfjellet: Tre. Dagar med liten kuling på Utvikfjellet: Tre. Turar til Varden: Ingen. Eting, slektstreff og synging av påskesongar akkompangert av bongotrommer: Sjølvsagt! Ekstravakter på psykiatrisk: To. Sitting i Eikenæsgropa: Ein gong, ti minutt.
Til neste påske: Skaffe skisko som ikkje er direkte ukomfortable, stavar som er fleire meter lange og ja, kanskje litt klister.
Mr. Fancypants vs. Herr Trendybukse
tysdag, 11. april, 2006
Eit skilt eg fekk laga om vindforholda på Utviken
Ein befinn seg relativt plutseleg på Sandane, påskehovudstaden. Veiret er diverre ikkje heilt der det skulle ha vore, men det er framleis tidleg. Mykje tid går med til eting av god mat, medan ein høyrer ein onkel eller to fortelje ei sjølvopplevd røvarhistorie - alt etter planen.
Trass mykje trekk og motbakke har eg og bror 2 fått eit par turar på Utvikfjellet, då bror 2 berre tok med ei av totalt to av mine ski, måtte eg låne pappa sine. Eg har med andre ord fått meg to skiturar på eit par Splitkein treski frå 1971, eg kan melde om godt feste, mykje klabb og heller laber gli.
Eg har fått undersøkt hovudet mitt
torsdag, 6. april, 2006
Betre enn kinderegg - mann, kafé, fotograf, kyrkje
Eg har tatt CT (computertomography) av hovudet - om eit par veker får eg vite om eg er ordinært eller ekstraordinært tett i skallen - eg held ikkje nett pusten i mellomtida. Det blir påske neste veke, vonleg med ein del skiturar på Utvikfjellet - du er velkomen til å joine Eikenæsarane der. Tradisjonen tru ladar eg opp med eit par fotobøker eg har fått sjuska til meg, Robert Frank si klassiske “The Americans” og René Burri si svært omfangsrike “Photographs” (frå favorittforlaget Phaidon!) - eg ser mest fram til sistnevnte. Til slutt, eg ser om att Wong Kar Wai sin feiande flott fotograferte film “In the mood for love” - nydeleg!
Fort og gale
måndag, 3. april, 2006
Malande katt i malt ansikt, Torgallmenningen laurdag
På onsdag er det PsychAid-konsert på Hulen, fire band, femti bols - kom, kom! Elles prøver eg å stable nettsidene til den nyoppstarta studentfotoklubben på beina, vi hadde opningsmøte førre veke og det møtte opp ein heil bøling entusiastiske folk, fabelaktig!
PsychAid nullseks
sundag, 2. april, 2006
Internasjonal dag, Torgallmenningen: Stylte-Marit og gamlekarane
Så går PsychAid nullseks mot slutten - fin aksjon, fint at det snart blir rolegare. Bøsseinnsamling er kanskje ikkje det kjekkaste eg er med på, spesielt vanskeleg er det å riste pengar ut av pensjonistar - det hjelp ikkje å nemne at pengane går til å hjelpe psykisk sjuke innnvandrarar heller (”bygg fengsel for pengane” høyrte ein eit par gonger). I alle høve, det går mot varmare og lysare tider, stilig!